រឿងនៃការផ្លាស់ប្តូរ៖ ស ពិសិដ្ឋ (ទស្សនិកជនតាមទូរទស្សន៍របស់ក្លាហាន9)

 “ខ្ញុំគិតថាខ្ញុំអាចមានក្តីស្រមៃធំជាងមុន ​ហើយខ្ញុំមានទំនុកចិត្តជាងមុនក្នុងការធ្វើឲ្យក្តីស្រមៃនេះក្លាយជាការពិត។ អ្នកមិនគួរបោះបង់ក្តីស្រមៃរបស់អ្នកចោលនោះទេ ទោះបីជាវាធំឬតូចក៏ដោយ អ្នកត្រូវតែមានគោលដៅច្បាស់លាស់ដើម្បីសម្រេចវាបាន។” ពិសិដ្ឋបាននិយាយ។

ពិសិដ្ឋបច្ចុប្បន្នកំពុងធ្វើការនៅធនាគារប្រៃសណីយកម្ពុជា។​ គាត់បានតាមដានកម្មវិធីក្លាហាន9តាមរយៈការចាក់ផ្សាយកម្មវិធីស្ថានីយក្តីស្រមៃតាមទូរទស្សន៍ និងតាមរយៈកម្មវិធី 9:09 តាមយូធូប។

ដោយមានការជម្រុញទឹកចិត្តតាមរយៈរឿងរបស់ស្រីរ៉ុង និងអ្នកផ្សេងទៀត ពិសិដ្ឋមានការតាំងចិត្តបន្ត និងពង្រឹងក្តីស្រមៃរបស់ខ្លួន។ តាមរយៈរឿងស្ថានីយក្តីស្រមៃផ្សេងទៀត ពិសិដ្ឋក៏បានរៀនពីការធ្វើផែនការហិរញ្ញវត្ថុ និងចែករំលែកទៅកាន់សិស្សនៅពេលដែលគាត់ស្ម័គ្រចិត្តបង្រៀនកម្មវិធីទូរស័ព្ទនៅវិទ្យាស្ថានមួយ។​

ពិសិដ្ឋបានរៀនពីរបៀបក្នុងការធ្វើគម្រោង ការរៀបចំគោលដៅ និងស្វែងរកគំនិតថ្មីៗដើម្បីសម្រេចក្តីស្រមៃរបស់ខ្លួន។ គាត់មានក្តីស្រមៃចង់បើកហាងកាហ្វេមួយ ហើយគាត់ទទួលបានគំនិតមួយចំនួនពីកម្មវិធីស្ថានីយក្តីស្រមៃដូចជា ការរៀបចំថវិកា ការធ្វើគម្រោងហិរញ្ញវត្ថុ ការចំណាយប្រចាំខែ  និងរៀបចំបញ្ជីសម្ភារៈដែលត្រូវការក្នុងការបើកហាងកាហ្វេ។ ​ ពិសិដ្ឋបាននិយាយថា គាត់និងសម្រេចវាឲ្យបានក្នុងរយៈពេលមួយឆ្នាំ។ គាត់បានទទួលស្គាល់ថាវាគឺជាក្តីស្រមៃធំមួយ ប៉ុន្តែគាត់នឹងមិនបោះបង់វាចោលជាដាច់ខាត។ “នៅតាមផ្លូវក្នុងការសម្រេចក្តីស្រមៃរបស់ខ្ញុំ មានឧបសគ្គច្រើនរាប់មិនអស់ ប៉ុន្តែខ្ញុំ​ត្រូវតែប្រឈមមុខនិងវា និងស្វែងរកវិធីណាដែលអាចសម្រេចបានដើម្បីដោះស្រាយបញ្ហាទាំងនោះ។” ពិសិដ្ឋបានបន្ថែម។

ដើម្បីរកលុយឲ្យបានច្រើន ពិសិដ្ឋចង់ពង្រីកហាងកាត់ដេរម្តាយរបស់គាត់ឲ្យធំជាងមុន។  “ខ្ញុំចង់ធ្វើឲ្យហាងកាត់ដេររបស់គ្រួសារខ្ញុំមានអ្នកជិតខាងស្គាល់ និងធ្វើឲ្យគេដឹងថាយើងពូកែលើជំនាញរបស់យើង។ ដូច្នេះ ហេតុអ្វីមិនធ្វើឲ្យវាធំជាងមុន?” គាត់បាននិយាយ។​

ដោយមានការជម្រុញទឹកចិត្តពីរឿងស្ថានីយក្តីស្រមៃរបស់ស្រីរ៉ុង ដែលពិសិដ្ឋបានមើល និងបង្ហាញទៅម្តាយរបស់គាត់បានសម្រេចចិត្តពិភាក្សាជាមួយម្តាយរបស់គាត់ដោយផ្ទាល់អំពីគម្រោងរបស់គាត់ “ខ្ញុំមិនហ៊ាននិយាយដោយចំហជាមួយម្តាយរបស់ខ្ញុំទេមុនពេលដែលខ្ញុំបានមើលស្ថានីយក្តីស្រមៃ។ ប៉ុន្តែឥឡូវខ្ញុំហ៊ានពិភាក្សាជាមួយគាត់ និងស្តាប់យោបល់គាត់” ពិសិដ្ឋបានបន្ថែម។ ជាផ្នែកមួយនៃគម្រោង ពិសិដ្ឋចង់សង់ផ្ទះមួយជាន់ទៀត ​ទើបគាត់អាចយកផ្ទះជាន់ក្រោមធ្វើជាហាងកាត់ដេរ។ គាត់ក៏មានគម្រោងខ្ចីលុយពីធនាគារ និងបែងចែកលុយដើម្បីសម្រេចគម្រោងរបស់គាត់។

ចំពោះទំនាក់ទំនងគ្រួសារ ពិសិដ្ឋបានរៀនស្វែងយល់ពីវីដេអូស្ថានីយក្តីស្រមៃរបស់គ្រីស ដែលជាមនុស្សប្រុសច្នៃម៉ូតសំលៀកបំពាក់។ គាត់ស្វែងយល់ពីនិន្នាការភេទនៅប្រទេសកម្ពុជាដែលកម្រិតមនុស្សភាគច្រើនមិនឲ្យសម្រេចក្តីស្រមៃរបស់ពួកគេ​ ហើយវាបានរំលឹកពិសិដ្ឋពីរឿងប្អូនរបស់គាត់។ ពិសិដ្ឋបានបង្ហាញរឿងរបស់គ្រីសទៅកាន់ម្តាយរបស់គាត់ ដោយសង្ឃឹមថាម្តាយគាត់និងយល់ពីជម្រើស ​និងអ្វីដែលប្អូនរបស់គាត់កំពុងធ្វើ។ ដោយមានការយល់ពីគ្នាទៅវិញទៅមក ទំនាក់ទំនងគ្រួសាររបស់ពិសិដ្ឋមានភាពប្រសើរឡើងទៅលើការចរចារ និងទទួលយកគំនិតពីគ្នាទៅវិញទៅមក។

រឿងនៃការផ្លាស់ប្តូរ ផលិតដោយ៖ អង្គការ BBC Media Action