រឿងនៃការផ្លាស់ប្តូរ៖ ស្រឿង ម៉ាយ៉ា (ទស្សនិកជនតាមទូរទស្សន៍របស់ក្លាហាន៩)

“បន្ទាប់ពីឪពុករបស់ខ្ញុំស្លាប់ទៅ ក្តីស្រមៃរបស់ខ្ញុំត្រូវបានកប់បាត់ទៅ។ ខ្ញុំមិនដែលប្រាប់នរណាម្នាក់អំពីវាទេ។ ហើយខ្ញុំមិនដែលគិតថាក្តីស្រមៃរបស់ខ្ញុំអាចទៅរួចទៀតទេ។” ពីមនុស្សស្រីវ័យក្មេងម្នាក់ដែលមានក្តីស្រមៃលក់កញ្ឆែតបោះដុំក្នុងសហគមន៍របស់នាង។

ម៉ាយា អាយុ២៤ឆ្នាំ រស់នៅក្នុងគ្រួសារដែលមានតែម្តាយ នៅជាយក្រុងភ្នំពេញ។ គ្រួសាររបស់នាងរកស៊ីចិញ្ចឹមជិវិតដោយលក់កញ្ឆែតទៅកាន់សហគមន៍ ប៉ុន្តែពួកគេមិនអាចរកចំណូលបានច្រើនពីមុខរបរនេះទេ។ ទោះបីជារកចំណូលបានតិចក៏ដោយ ម៉ាយ៉ានៅតែមានក្តីស្រមៃពង្រីកអាជីវកម្មគ្រួសាររបស់នាងដោយការលក់កញ្ឆែតបោះដុំក្នុងចំនួនច្រើន។

ប៉ុន្តែអ្វីដែលនាងអាចគិតឃើញ គឺធ្វើរឿងដដែលជាមួយអាជីវកម្មរបស់គ្រួសារគាត់ និងស្វែងរកការងារធ្វើ។

ទោះបីជាយ៉ាងណាក៏ដោយ បន្ទាប់ពីបានមើលរឿងស្ថានីយក្តីស្រមៃរបស់ស្រីរ៉ុង ដែលនាងជួបឧបសគ្គក្នុងដំណើរជីវិតដូចគ្នា ម៉ាយ៉ាក៏ចាប់ផ្តើមមានក្តីសង្ឃឹមក្នុងក្តីស្រមៃម្តងទៀត។ ម៉ាយ៉ាបានរំលឹកពេលវេលាដែលឪពុករបស់នាងនាំនាងទៅកាន់កន្លែងដាំកញ្ឆែត ដែលវាបានធ្វើឲ្យនាងចង់បន្តអាជីវកម្មមួយនេះ និងពង្រីកវាឲ្យធំជាងមុន។ “ខ្ញុំមានកំលាំងចិត្តចាប់ផ្តើមវាម្តងទៀត ដោយសារតែខ្ញុំបានឃើញនូវភាពក្លាហានរបស់ស្រីរ៉ុង ហើយខ្ញុំគិតថាខ្ញុំនិងអាចធ្វើដូចនាងបាន។​”  ម៉ាយ៉ានិយាយ។

ដោយមានការជម្រុញពីស្ថានីយក្តីស្រមៃ ម៉ាយ៉ាបានស្វែងយល់ពីសារៈសំខាន់នៃការមានក្តីស្រមៃ និងកែប្រែវាឲ្យក្លាយជាការពិត។ កម្មវិធីក៏បានបង្កើនទំនុកចិត្តរបស់នាងឲ្យសុំយោបល់ពីមិត្តភក្តិ គ្រួសារ និងអ្នកជិតខាងអំពីផែនការអាជីវកម្មរបស់គាត់។ ដោយមានឆន្ទៈនិយាយទៅកាន់អ្នកដទៃ ម៉ាយ៉ាមានអារម្មណ៍ថាទទួលបានការគាំទ្រពីមនុស្សនៅជុំវិញខ្លួន និងឈប់គិតពីការបោះបង់វា។ “ស្ថានីយក្តីស្រមៃបានបង្រៀនខ្ញុំឲ្យដឹងថា អ្នកជំនាញ ឬអ្នកណែនាំអាចជាគ្រួសារ មិត្តភក្តិ និងអ្នកជិតខាង”  ម៉ាយ៉ាបានបន្ថែម។

បច្ចុប្បន្ន ម៉ាយ៉ាកំពុងធ្វើការជាអ្នកសំអាតក្រៅម៉ោងនៅកាស៊ីណូមួយនៅភ្នំពេញ ដើម្បីផ្គត់ផ្គង់គ្រួសារបស់នាងបន្ថែមពីលើប្រាក់ចំណូលតិចតួចដែលគ្រួសារនាងរកបានពីការលក់កញ្ឆែត។ នាងក៏បានសន្សំលុយមួយចំនួនពីប្រាក់ខែដើម្បីសម្រេចគោលបំណងក្នុងការពង្រីកអាជីវកម្មគ្រួសាររបស់នាង។ ម៉ាយ៉ាបានបង្ហាញការតាំងចិត្តរបស់ខ្លួនថា៖“ទោះបីជាខ្ញុំមិនប្រាកដថាខ្ញុំអាចសម្រេចក្តីស្រមៃរបស់ខ្ញុំបានក៏ដោយ តែឥលូវខ្ញុំហ៊ានមានក្តីស្រមៃ។”

រឿងនៃការផ្លាស់ប្តូរ ផលិតដោយ៖ អង្គការ BBC Media Action