រឿងនៃការផ្លាស់ប្តូរ៖ សែ មិនា (យុវទូតក្លាហាន9)

មិនា អាយុ២១ឆ្នាំ​ បច្ចុប្បន្នគឺជានិស្សិតសាកលវិទ្យាល័យវេស្ទើនខេត្តកំពង់ចាម និងក៏ជាគ្រូបង្រៀនម្នាក់នៅខេត្តត្បូងឃ្មុំដែលមិនជាឆ្ងាយប៉ុន្មានពីផ្ទះរបស់នាង។ កាលពីនៅថ្នាក់វិទ្យាល័យ មិនាមានក្តីស្រមៃចង់ក្លាយជាអ្នកបកប្រែ និងបន្តការសិក្សាថ្នាក់ឧត្តមសិក្សានៅសាកលវិទ្យាល័យ។ ការសម្រេចក្តីស្រមៃរបស់មិនាមានការលំបាក នាងមិនមានឱកាសបន្តការសិក្សាថ្នាក់បរិញ្ញាបត្របន្ទាប់ពីនាងបានបញ្ចប់ការសិក្សាថ្នា្កក់ទី១២ ដោយសារតែគ្រួសារមិនមានលទ្ធភាពគ្រប់គ្រាន់។ បន្ទាប់មក ឪពុកម្តាយរបស់មិនាក៏បានសុំឲ្យនាងប្រលងចូលធ្វើជាគ្រូបង្រៀនសាលារដ្ឋ។

មិនាបានស្គាល់កម្មវិធីក្លាហាន9ចាប់តាំងពីឆ្នាំ២០១៦ តាមរយៈកម្មវិធីផ្សព្វផ្សាយតាមសហគមន៍របស់ក្លាហាន9 និងនៅក្នុងឆ្នាំ​២០១៧​ ពេលដែលនាងបានក្លាយជាយុវទូតក្លាហាន9។ មិនាបានទទួលឥទ្ធិពលយ៉ាងច្រើនពីខ្សែរឿងស្ថានីយក្តីស្រមៃរបស់ស្រីរ៉ុង។ នាងពិតជាមានការកោតសរសើរចំពោះស្រីរ៉ុង ដោយសារតែស្រីរ៉ុងហ៊ានមានក្តីស្រមៃខ្ពស់ និងយកឈ្នះឧបសគ្គក្នុងគ្រួសារដើម្បីសម្រេចនូវអ្វីដែលនាងចង់ធ្វើ។ តាមរយះរឿងនេះ មិនាបានរៀនពីការរៀបចំជំហានសំខាន់ៗសម្រាប់គោលដៅ និងជំហានសម្រាប់ជីវិតឡើងវិញ។ នៅថ្ងៃអនាគត នាងចង់ធ្វើការនៅក្នុងអង្គការក្រៅរដ្ឋាភិបាល ជាជាងធ្វើជាគ្រូបង្រៀនដូចជាការងារបច្ចុប្បន្ន។ ស្ថានីយក្តីស្រមៃបានជួយនាងមិនឲ្យបោះបង់ចោលក្តីស្រមៃ ចាប់ផ្តើមបង្កើតគម្រោង ដើរទៅមុខបន្តជាមួយសកម្មភាព។ ជាសកម្មភាព មិនាកំពុងខិតខំបង្កើតទំនាក់ទំនងជាមួយបណ្តាញយុវជន និងធ្វើការស្ម័គ្រចិត្តនៅក្នុងអង្គការក្រៅរដ្ឋាភិបាលផ្សេងៗ។ មិនាជឿជាក់ថាជំហានទាំងអស់នេះអាចជួយឲ្យនាងឈានទៅមុខកាន់តែជិតទៅកាន់ក្តីស្រមៃធ្វើការក្នុងវិស័យដែលនាងចូលចិត្ត។

មិនាក៏បានប្រើប្រាស់ចំណេះដឹងដែលនាងទទួលបានពីស្ថានីយក្តីស្រមៃដើម្បីប្រើប្រាស់នៅក្នុងគ្រួសាររបស់នាង។ ទោះបីជាគ្រួសាររបស់នាងមិនមានលទ្ធភាពគ្រប់គ្រាន់បង់ថ្លៃសាលាឲ្យនាងក៏ដោយ តែមានរឿងផ្សេងទៀតដែលមិនាអាចចរចារជាមួយគ្រួសារបាន។ នាងបានចាប់ផ្តើមពិភាក្សាជាមួយឪពុកម្តាយរបស់នាងអំពីការធ្វើការនៅក្នុងវិស័យរដ្ឋ​សិន និងសន្សំលុយឲ្យបានគ្រប់គ្រាន់មុនពេលនាងអាចបន្តការសិក្សាថ្នាក់ឧត្តមសិក្សាបាន។“ពេលដែលពេលវេលាសាកសមមកដល់ ខ្ញុំនិងអាចសម្រេចក្តីស្រមៃបាន បើសិនជាខ្ញុំមិនបញ្ឈប់វា”  មិនានិយាយ។ ជាងនេះទៅទៀត នាងក៏បានប្រើប្រាស់ចំណេះដឹងដែលនាងបានរៀនពីក្លាហាន9 ដើម្បីចែករំលែកជាមួយមិត្តភក្តិរបស់នាង។ កម្មវិធីស្ថានីយក្តីស្រមៃរបស់ក្លាហាន9​មានឥទ្ធិពលទៅលើមិនាដូចជា នាងមានគោលដៅច្បាស់លាស់ជាងមុន  មានការជម្រុញទឹកចិត្ត និងមានភាពសប្បាយរីករាយ។

“កំណត់គោលដៅ ធ្វើអ្វីដែលអ្នកស្រលាញ់ មានឆន្ទៈ និងភាពក្លាហានធ្វើអ្វីដែលខ្លួនគិតថាជាក្តីស្រមៃ ​នោះអ្នកនិងអាចសម្រេចវាបាន។”  មិនានិយាយ។

រឿងនៃការផ្លាស់ប្តូរ ផលិតដោយ៖ អង្គការ BBC Media Action