រឿងនៃការផ្លាស់ប្តូរ៖ សំ សាវង្ស (អ្នកតាមដានតាមប្រព័ន្ធអនឡាញរបស់ក្លាហាន9)

បច្ចុប្បន្ន សាវង្សគឺជានិស្សិតផ្នែកវិស្វកម្មព័ត៌មានវិទ្យានៃសាកលវិទ្យាល័យភូមិន្ទភ្នំពេញ។​ គាត់មានក្តីស្រមៃចង់បើកក្រុមហ៊ុនអភិវឌ្ឍន៍វេបសាយមួយ។​ ដើម្បីសម្រេចក្តីស្រមៃ សាវង្សបានបែងចែកគម្រោងរបស់គាត់ជាពីរ៖គម្រោងរយៈពេលខ្លីគឺដាក់ពាក្យហាត់ការក្នុងក្រុមហ៊ុន​មួយ បង្កើតកម្មវិធីតាមអ៊ីនធើណេតដើម្បីជួល និងលក់អចលនទ្រព្យ និងគម្រោងរយះពេលវែងគឺបង្កើតក្រុមហ៊ុនផ្ទាល់ខ្លួនមួយក្នុងរយះពេល៥​ ទៅ១០ឆ្នាំ​ដោយប្រើបទពិសោធន៍ដែលគាត់មាន។ សាវង្សកំពុងស្ថិតនៅក្នុងដំណាក់កាលទីមួយគឺរៀនពីបទពិសោធន៍របស់អ្នកដឹកនាំល្បីៗ។

សាវង្សបានទទួលការជម្រុញយ៉ាងច្រើនពីទំព័រហ្វេសប៊ុកក្លាហាន9។​ គាត់បានរំលឹកពីវីដេអូរបស់ស្ត្រីបើករ៉ឺម៉កកង់បីដែលត្រូវបានគេសើចចំអកដាក់ ដោយសារតែគំនិតចាស់គំរិលដែលគិតថាវាជាអាជីពរបស់មនុស្សប្រុស។ ទោះបីជាមានការរើសអើង និងការរិះគន់យ៉ាងណាក៏ដោយ ស្ត្រីបើករ៉ឺម៉កកង់បីបានរៀនធ្វើខ្លួនឲ្យសុំាំជាមួយពាក្យទាំងនោះ និងបន្តអាជីពរបស់គាត់ដោយការពេញចិត្ត។  តាមរយះរឿងនេះ សាវង្សបាននិយាយថា “ជាមួយនិងការជម្រុញទឹកចិត្ត និងឆន្ទះខ្ពស់ ខ្ញុំអាចយកឈ្នះនូវឧបសគ្គ និងការរិះគន់ទាំងឡាយពីមនុស្សនៅជុំវិញខ្លួន  និងធ្វើឲ្យប្រាកដថា​ ពាក្យអវិជ្ជមានទាំងអស់មិនមានផលប៉ះពាល់លើអ្វីដែល​ខ្ញុំកំពុងធ្វើ។”

ម្យ៉ាងវិញទៀត វីដេអូអំពីសិល្បៈកម្មកែច្នៃទៀនបាន​បង្រៀនសាវង្សអំពីការប្រើប្រាស់របស់ឡើងវិញ ដូចជាការកែច្នៃកំទេចទៀនទៅជាស្នាដៃសិល្បៈដ៏ស្រស់ស្អាត។ សាវង្សបានចាប់ផ្តើមចូលរួមសកម្មភាពសង្គម និងការស្ម័គ្រចិត្ត។​ តាមរយៈវីដេអូនោះ សាវង្សបាន​និយាយថា គាត់បានរៀនពីសារៈសំខាន់នៃការកែច្នៃរបស់ប្រើប្រាស់ឡើងវិញ និងសកម្មភាពស្ម័គ្រចិត្ត។ គាត់ក៏បានផ្លាស់ប្តូរទំលាប់មករើសសម្រាមនៅទីសាធារណៈ ទោះបីជាពេលខ្លះមិត្តភក្តិរបស់គាត់សើចចំអកដាក់ក៏ដោយ។ បន្ទាប់ពីបានមើលមាតិកាអំពីការចរចារ  សាវង្សបានស្វែងយល់ពីចំណុចនៃការប្រើប្រាស់ហេតុផលច្បាស់លាស់ដើម្បីបញ្ចុះបញ្ចូលអ្នកដទៃ​ក្នុងពេលចរចារ និងដើម្បីដោះស្រាយបញ្ហា។​ ម្យ៉ាងវិញទៀត វាក៏ជាចំណុចថ្មីមួយសម្រាប់គាត់ដែលបង្ហាញថាការចរចារក៏អាចប្រើប្រាស់នៅក្នុងការសម្ភាសន៍ការងារបានដែរ។

ប្រព័ន្ធផ្សព្វផ្សាយសង្គមរបស់ក្លាហាន9 បានផ្តល់ចំណេះដឹងសំខាន់ៗមួយចំនួនក្នុងការបង្កើតផែនការរយះពេលខ្លី និងវែងរបស់សាវង្ស​។ គាត់បានចាប់ផ្តើមបង្កើតផែនការសម្រាប់សកម្មភាពរបស់គាត់ កត់សម្គាល់ពីសារៈសំខាន់នៃការមានផែនការ និងមានការជម្រុញទឹកចិត្តក្នុងការដើរទៅមុខជាមួយផែនការរបស់គាត់។ តាមរយៈការធ្វើពិសោធន៍ជាមួយវីដេអូ និងមាតិកាផ្សព្វផ្សាយរបស់ក្លាហាន9 សាវង្សចាប់ផ្តើមដាក់កាលកំណត់សម្រាប់ការងាររបស់គាត់ និងជម្រុញឲ្យគាត់ខិតខំធ្វើសកម្មភាពជាជាងពន្យារពេលពីមួយថ្ងៃទៅមួយថ្ងៃ។​ ទោះបីជាមាតិការបស់ក្លាហាន9មិនមានអ្វីថ្មីច្រើនសម្រាប់គាត់ តែមាតិកាទាំងនោះនៅតែជាការដាស់តឿនប្រចាំថ្ងៃសម្រាប់គាត់ឲ្យផ្តោតទៅលើការធ្វើផែនការ និងការជម្រុញទឹកចិត្តឲ្យធ្វើសកម្មភាពលើផែនការនោះ។ សាវង្សបានយាយថា ទំព័រហ្វេសប៊ុករបស់ក្លាហាន9ពិតជាមានប្រយោជន៍ ពីព្រោះវាបានជម្រុញទឹកចិត្តមនុស្សឲ្យដើរតាមក្តីស្រមៃរបស់ពួកគេ។  សម្រង់សម្តីរបស់ក្លាហាន9 ក៏គួរឲ្យចាប់អារម្មណ៍ចំពោះគាត់ផងដែរ ដោយសារវាអាចធ្វើឲ្យអារម្មណ៍ញគាត់ធូរស្រាល និងកាត់បន្ថយភាពតានតឹង។ ការផ្លាស់ប្តូរដ៏សំខាន់សម្រាប់សាវង្សគឺគាត់មើលឃើញក្តីស្រមៃរបស់គាត់ធំជាងមុន និងការចាប់ផ្តើមធ្វើផែនការតាមដំណាក់កាល។ ការផ្លាស់ប្តូរបែបនេះអាចជួយត្រួសត្រាយផ្លូវឲ្យគាត់ក្នុងការសម្រេចក្តីស្រមៃធំនៅពេលអនាគត។ សាវង្សបាននិយាយសង្កត់ធ្ងន់ថា៖ “កុំឲ្យពាក្យរិះគន់របស់អ្នកដទៃបំផ្លាញគម្រោងនិងអ្វីដែលអ្នកមានឆន្ទៈចង់ធ្វើ”។

រឿងនៃការផ្លាស់ប្តូរ ផលិតដោយ៖ អង្គការ BBC Media Action